2026 жылғы футболдан әлем чемпионатында тағы бір тарихи кеш өтті. Аргентина құрамасының капитаны Лионель Месси Алжир қақпасына үш гол соғып, командасының 3:0 есебімен сенімді жеңіске жетуіне жол ашты. Алайда бұл матч тек нәтижесімен емес, аргентиналық жұлдыздың жаңа рекордтарымен де ерекшеленді, деп хабарлайды kaztourism.media.
Ең алдымен, Лионель Месси футбол тарихында алты әлем чемпионатына қатысқан алғашқы ойыншы атанды. Бұл көрсеткіш оның жиырма жылдан астам уақыт бойы әлемдік деңгейде тұрақты өнер көрсетіп келе жатқанын дәлелдейді.
Сонымен қатар, Месси әлем чемпионаты тарихындағы гол соққан және хет-трик жасаған ең жасы үлкен футболшы ретінде рекорд орнатты. Ол бұл жетістікке 38 жас 357 күнінде қол жеткізіп, 36 жыл бойы сақталған камерундық аңыз Роджер Милланың рекордын жаңартты.
Аргентина көшбасшысы тағы бір ерекше белесті бағындырды. Месси әлем чемпионаттарында 11 түрлі ұлттық құраманың қақпасына гол соққан алғашқы футболшы атанды. Бұл оның бірнеше буын футболшыларына қарсы ойнап, әр дәуірде жоғары деңгейін сақтай алғанының айқын дәлелі.
Алжирге қарсы хет-триктен кейін Мессидің әлем чемпионаттарындағы гол саны 16-ға жетті. Осылайша ол Германия құрамасының бұрынғы шабуылшысы Мирослав Клоземен теңесіп, турнир тарихындағы үздік сұрмергендер қатарына көтерілді.
Бір қызығы, Мессидің әлем чемпионатындағы алғашқы және соңғы голдарының арасын дәл 20 жыл бөліп тұр. Мұндай тұрақтылық пен ұзақ ғұмырлы мансап әлем футболы тарихында сирек кездеседі.
Материалды дайындаған: Әлішер Маратұлы
